题目看上去妖妖怪怪，实际上，我想讲厄是一篇报道厄专业精神和娱乐精神。
        朋友厄朋友么空，所以我出着一记外快——去听克里斯蒂娜·阿奎莱拉的演唱会。还是内场，11排，出生到今朝，第一趟勒了大舞台内场听音乐会。像乡下人进城一样，一时头里内场进口还寻不着。一个保安告诉阿拉，勒了下头，走东、西大门。进去后习惯性往后走，一个大学生煞气厄义工，看阿拉么方向，再告诉阿拉，内场要朝前走。呵呵，阿拉实在活得么腔调。
        不要以为内场才是好厄，特别是听格种“亲零狂啷”、闹闹猛猛的音乐会，坐了前头一点么好处。鼓声，贝司声实在太响了——心脏吃勿消，或者讲，伊厄辰光自家好像已经么心跳了，心脏里厢完全是“哐浪哐浪”厄大贝司的音量。所有厄歌全部勒了拔出仔喉咙急叫，还要蹬脚捏紧拳头做劲道。至于伊勒了唱啥，基本勿懂。只晓得格只喉咙真好，穷唱不唱也不会破格，能量大得来赛过可以用来发电哦。
        不过，看了阿拉报纸上“连唱17首仅破了一个音”，阿拉再晓得，啥叫“外行听闹猛，内行听门道”。勒了介吵厄环境里听出伊喉咙破了一记，真需要一只专业耳朵。所以，这篇文章的题目老另格，一记头，就把阿拉记者的专业水平拎出来了，划划胖讲，格叫体现了阿拉记者厄专业精神。
        不过，报道里还有一段关于肚皮厄话题，大概是某些市场需要的娱乐精神。弄法弄法要弄到人家肚皮上去，“微凸着小腹的克丽斯蒂娜尽管不愿回应怀孕传闻”，但不写不来事，是娱乐精神的体现。其实，马路上去看看，稍许胖一点的女小人，总归有点“微凸着小腹”的，全部才要合理联想，不是要吃力煞！幸亏之前勿晓得关于伊肚皮的传闻，否则一夜道看伊又蹦又跳满场子乱奔，阿拉勿是要帮以穷担心？
        专业精神是记者的追求，娱乐精神是市场的需要，现在厄人，不会睬啥“鱼和熊掌不可兼得”，记者也蛮难做厄。
        不过，当时还有两只细节，一只是专业的，一只是娱乐的：
        一是：唱到一半辰光，克丽斯蒂娜吊带衫或者是后背心厄话筒电线落下来了。一个伴舞马上接翎子走到伊身后，帮伊重新扎紧。也许是紧张，扎半天么扎好。格段辰光里厢，伊立勒台中央照唱，不动声音，不改喉咙，像啥事体么发生一样；
        一是：克丽斯蒂娜钻进了一辆白色的加长的凯得拉克，前头么警车开道。一群痴头怪脑小姑娘，跟勒了车子后头，哇拉哇拉乱叫。