凡事总归有好有坏的。譬方讲阿拉，单位今朝开张，明朝关门；办公室申报馆、天津路、２５楼、２０楼，搬东搬西搬上搬落，呒没格东西交关，有格东西也交关，譬方讲，银行卡：民生卡、明珠卡、太平洋卡、龙卡、东方卡、长城卡、牡丹卡、申卡、招商卡。绝对勿是勒了豁胖扎台型，因为大部分卡里清水光汤不算，换单位换卡，原单位的卡也就从“涓涓细流”变成了“一潭死水”，一点花头呒没。按理是要把没用格卡清退，但退卡要到办卡行里去，麻烦，所以，被迫放了勒，权当到此一游。
        印象当中，排队比较吃力格地方福州路上工商银行。没有位子，全部立。想想勿通格是，工商银行摊头算得多来，赛过比现在格大饼油条摊头还要多，但就是一日到夜排队，外表看上去，上海人钞票是多。格也说明，工商银行拉储户能力超一流，服务储户的能力还有待提高。特别是吃饭辰光，门是开了勒，但一般只有一只开勒了，其他人捏？伊拉拉，阿拉勿要吃饭阿？有道理厄！排６０分钟没行过，但４０分种我是行过格。格么，调整一下吃饭辰光，中午休息辰光为阿拉多开几只窗口好了。
        比较牛格地方是九江路上的中国银行，门面来得格大，两只窗口办信用卡，两只窗口办个人现金业务，其它交关窗口要么空着，要么不晓得办啥。业务做得介大，没有自动存款机，自动取款机还常常不工作。中国银行股票勿另，也许跟伊拉格服务态度有关。想想看，要是奈储户全部服务成伊拉股东，格么，股票价钿就上去了
        上海银行也有好白相事体。前两天勒了屋里门口头一只上海银行。走进去，发现取号头格机器好格，但是叫号头格机器坏特了。结果乱了。一个保安，两个银行工作人员，一个招呼人家取号，一个招呼人家按号头坐位子，一个勒了跟人家解释，应付提意见的顾客。忙得汗一身，吃力不讨好。我看不过去了，就跟一个看上去像小头头格女人讲，让一个小姑娘关照进门顾客领号头，让一个保安叔叔立在队伍头上喊号头，人家坐在哪里不用管的，侬呢，进去坐了柜台做生活，增加一个人手，阿拉排队辰光也好短一眼。结果，格女人翻我一记白眼：侬晓得伐，保安没有上岗证格，伊不可以喊号头格——听勒我差点厥到，就喊喊号头呀，就算做好人好事好了，要啥上岗证拉。
        现在，九江路四川路口口头伊只建行排队勿吃力格，里厢环境老好格，大堂老高格，光线好像得有阳光顶蓬格；两边是柜台，柜台前是背靠背两排沙发，通常一人可以坐一只三人沙发；大堂中间有五六米的空余地带，宽落落，像大会堂一样格。一个大堂经理样子格男人跑来跑去，提醒柜面服务员：格只号头没有人，跳过去喊号吧。所以，中午休息辰光，从进去到出来，等不了１０分钟，事体办好了。像格种环境好格银行，就算伊辰光长点，等的心情也不会很差。
        附近，排最长队伍可能是江西中路上的交行。有一次１１点左右去，领了号头，排３０分钟，看看还有几十人在前头。于是决定回来到食堂吃饭。饭吃好，回办公室喝口茶，笃悠悠再去。带张报纸，重新领号坐下，突然发现，正好喊到我上午领的那个号头——哈哈，不用重排队了，像捡到一只皮夹子。